Շիրակի մարզում գյուղատնտեսությունը մահանում է, գյուղերում սարսափելի վիճակ է. Թումասյան 2021-07-23   1858     

Այս պահին երաշտն իր ամենակրիտիկական վիճակի մեջ է։ Շիրակի մարզում գյուղատնտեսությունը մահանում է։ «Փաստինֆո»-ի հետ զրույցի ժամանակ այս մասին ասաց «Շիրակ կենտրոն» ՀԿ նախագահ Վահան Թումասյանը։

Նրա խոսքով մարզում առաջին խնդիրն անտերությունն է. «Տնից տեղից հեռու, երբ մարդ է մահանում, հարազատներն ու բարեկամները գնում ու ցավակցում են, հիմա Շիրակի մարզում ամբողջ գյուղատնտեսությունը մահանում է, հատկապես Անիի վարչական շրջանի գյուղերում սարսափելի վիճակ է, որովհետև ոչ միայն հացահատիկի բերք չկա, այլև խոտ չկա։ Ձմռանը մոտ 60-70 տոկոս անասունների խոշոր գլխաքանակի կրճատում կլինի»,-նշեց Վահան Թումասյանը։

Մարզի բնակիչները դաշտերից լավագույն դեպքում քաղում են այնքան, ինչքան ցանել են, իսկ վատագույն դեպքում նույնիսկ դա չեն քաղում։ Անիի ամբողջ շրջանում նաև կոմբայն չկա. «Հիմա մենք ընկել ենք կոմբայն ենք ման գալիս, որ չնչին հացահատիկը կարողանանք քաղել։ Նախորդ տարիներին, երբ առատ բերք է եղել, շահագրգռված են եղել, ինքնուրույն այլ մարզերից տեխնիկա են բերել ու արել են։ Կարո՞ղ էր չէ մարզպետը կամ կառավարությունից մեկը կազմակերպել և 2 տեխնիկա բերեին, որ բերքը դաշտում չմնա։ Մարդիկ մոլորված ման են գալիս»,-ասաց Վահան Թումասյանը։

Վերջինս ընդգծեց նաև Գյումրի-Արմավիր ճանապարհի ռազմավարական կարևորությունն ու ոչ բարվոք վիճակը։ Վահան Թումասյանի խոսքով Բավրայի մաքսատնից մտնող բոլոր բեռնատար մեքենաները դեպի Երևան այդ ճանապարհով են անցնում, սակայն նույնիսկ փոսալցումներն այդտեղ երազանք են. «Ամեն օր մեքենա է ջարդվում։ Նման անտերություն, որ Շիրակի մարզում է և հատկապես Անիի շրջանի գյուղերում, հնարավոր չէ պատկերացնել։ Խեղճ ու կրակ, խելոք ժողովուրդ են։ Բոլոր գյուղերը զոհեր ունեն, հիմա մոլորված, պարտքերի ու վարկերի տակ են»,-ասաց Վահան Թումասյանը՝ նկատելով, որ սոցիալական խնդրի մասին խոսելն անգամ ավելորդ է, քանի որ այդ մարդիկ առհասարակ ոչինչ չունեն։

Մարզում վատ է նաև կենդանիների վիճակը, ինչպես Վահան Թումասյանն է նկարագրում, կենդանիներն այստեղ սարեր ու քարեր են կրծում։ Անգամ կաթ չեն տալիս, քանի որ սարերում խոտ էլ չկա. «Գոնե պետք է կազմակերպեին ու մի տեղից մի քանի մեքենա խոտ բերեին, բաժանեին ամենախոցելի խմբերին, բայց ոչինչ չի արվում։ Մասսայական անտերություն է։ Հասկանալի է, որ երաշտ է, բայց նման դեպքերում իշխանությունը նրա համար է, որ ռիսկերը կանխի»,-նշեց Վահան Թումասյանը։

Հասարակական կազմակերպության նախագահը նկատեց՝ գյուղերում տների կեսը դատարկ է. «Մտնում ես մարդկանց տուն, կարծես մեռելի տուն մտած լինես»։

Իշխանությունները քաջատեղյակ են ստեղծված իրավիճակից, և Վահան Թումասյանի խոսքով նրանք պետք է փորձեն գոնե մի հարց լուծել, որ մարդիկ կարողանան դուրս գալ այս բարդ իրավիճակից։

Աղբյուր` Փաստինֆո