Որտե՞ղ փնտրել, այսպես կոչված, մութ հարցերի պատասխանները․ Վ․Թումասյան 2019-03-20   993     

ՀՀ վարչապետ Նիկոլ Փաշինյանը լրագրողների հետ այսօր կայացած հանդիպման ժամանակ, պատասխանելով Գյումրու անօթևանության խնդրի մասին լրագրողներից մեկի հարցին, ասել է. «Պետությունը այսօր, մենք չգիտենք, թե քանի մարդու նկատմամբ ունի պարտավորություն. դա ամենադժվար վիճակն է»:
Ուրեմն անցած 10 տարվա մեջ ես արդեն մի հարյուր անգամ առաջարկել եմ պետության համար, չեմ հասկանում ինչու ամենադժվարը համարվող այդ հարցերի պատասխանը շատ արագ գտնելու ճանապարհը, այն է.

1. Կառավարության կողմից հստակ ֆիքսել, թե ի վերջո ինչպիսի՞ կարգավիճակ ունեցող անօթևան ընտանիքների հանդեպ է բնակապահովման պարտավորություն վերցնում պետությունը, օրինակ, 1988-ի երկրաշարժի պատճառով բնակարան կորցրած և մինչև օրս չփոխհատուցված ընտանիքների, մասնակի փոխհատուցված և բազմանդամ այն ընտանիքների, որոնք թեև կորցրած սենյակների քանակով փոխհատուցվել են, սակայն ՀՀ կառավարության համապատասխան որոշմամբ թույլատրվել է տվյալ ընտանիքներին կիսվել, մի մասին տեղափոխվել նոր բնակարան, մյուս մասին շարունակել բնակվել ժամանակավոր կացարանում, երկրաշարժի ժամանակ աղետի գոտու բնակավայրերում վարձով կամ հանրակացարանում բնակված և երկրաշարժից հետո մշտապես աղետի գոտում ժամանակավոր կացարաններում բնակվող ընտանիքներին և այլն:
Այդ ամենը փաստել կառավարության որոշմամբ և ապա ընդունել որոշում և.

2. Աղետի գոտում իրականացնել վերոհիշյալ պահանջներին համապատասխանող, բնակապահովման ենթակա անօթևան ընտանիքների փաստագրում, հաշվառում և հերթացուցակի կազմում:

3. Աղետի գոտում վերսկսել բնակարանային շինարարություն, վթարային շենքերի ամրացման և բնակարանների գնման վկայականների տրամադրման գործընթաց:

Ահա ընդամենը այս ամենն է պետք իրականացնել, այդ դեպքում այլևս անհասկանալի և մութ հարցեր չեն լինի և անօթևանության խնդիրն էլ կլուծվի:

Հ.Գ. Անկեղծ ասած՝ 10 տարի շարունակ այս և համանման տասնյակ առաջարկություններով հարյուրավոր հրապարակումներ եմ արել, բայց չեմ կարողանում հասկանալ, թե հատկապես ումի՞ց և որտեղի՞ց ենք սպասում, այսպես կոչված մութ հարցերի պատասխանները:

Վահան Թումասյան
«Շիրակ կենտրոն» ՀԿ նախագահ