Բարեգործություն, որի համար ՊԵԿ-ը պատժում է «Շիրակ կենտրոնին» 2016-09-14   2714     

Գյումրիում բարեգործական հիմունքներով անօթեւան ընտանիքների խնդիրներով զբաղվող «Շիրակ կենտրոն»-ը օրերս ՀՀ Պետական եկամուտների կոմիտեից գրություն է ստացել՝ տեղեկանալով, որ կենտրոնը չի վճարել ֆիզիկական անձանցից ձեռք բերած թվով ութ բնակարանների համար անհրաժեշտ եկամտային հարկը: Խոսքը շուրջ 5 մլն դրամ գումարի մասին է: Իսկ բնակարանները, ինչպես հայտնի է, «Շիրակ կենտրոնը» գնում է հովանավորների աջակցությամբ՝ անօթեւան գյումրեցիներին անհատույց տրամադրելու համար:

Ստացվում է, որ բարեգործական նպատակով գնվող բնակարանների համար կենտրոնը ստիպված է եկամտահարկ վճարել: Այս կապակցությամբ «Շիրակ կենտրոնի» ղեկավար Վահան Թումասյանը նամակով դիմել է ՀՀ Կառավարությանը, Սերժ Սարգսյանին, ՊԵԿ ղեկավարությանը՝ տեղեկացնելով, որ շահույթ չստացած կազմակերպությունը չի կարող շահութահարկ վճարել, եւ խնդրել է այդ բեռից ազատել կենտրոնին:

Այսօր մեզ հետ զրույցում Թումասյանն ասաց, որ ոչ նախագահականից, ոչ կառավարությունից արձագանք դեռ չեն ստացել: Փոխարենը նոր նամակ են ստացել ՊԵԿ-ից, որում Գյումրու տարածքային հարկային տեսչության պետը երկար բացատրել է հարկային օրենքները եւ կրկին պահանջել եկամտահարկը:

«Ասում եմ շահույթ չհետապնդող կազմակերպությունը ո՞նց կարող է շահույթ հետապնդել, որ շահութահարկ վճարի, ասում են օրենք կա: Չեն ընդունում, որ օրենքում բաց կա եւ պետք է շտկել. օրենքը վերաբերում է իրավաբանական անձանց: Պետք է տարբերակվի, որ եթե բարեգործական նպատակով է՝ չպետք է հարկվի: Մենք հուշում ենք ճանապարհը, պետք է Կառավարության բարեգործական ծրագրերի համակարգող հանձնաժողովը բարեգործական ճանաչի ծրագիրը եւ այդ բեռը հանի «Շիրակ կենտրոն»-ի վրայից: Դրանից հետո քայլեր կլինեն, որովհետեւ դա հսկայական գումար է, մեր կենտրոնի գոյության խնդիրն է կասկածի տակ դրվում»,- նկատեց Թումասյանը:

Հարցին՝ հնարավո՞ր է դիմեք հանրության աջակցությանը այս հարցը լուծելու համար, Թումասյանը պատասխանեց.

«Ամենաչսիրածս բանը դրամահավաքն է: Ձմեռը մոտենում է, 3000 մարդ ձմռան վառելափայտի կարիք ունի, եթե ես գումար հավաքեմ, էդ գումարով մարդկանց վառելափայտի հարցը կլուծեմ: Գումար հավաքեմ ու տամ հարկայինի՞ն: Հովանավորներն էլ չեն համաձայնի հավելյալ գումար տալ: Մարդիկ համ տուն առնեն, պետության հոգսը թեթեւացնեն, համ էլ պետությանը դրա համար հա՞րկ տան: Չեն անի: Ստացվում է, որ մեր ծրագրերը պետք է սառեցվեն: Մինչդեռ հենց այսօր մենք երկու բնակարանի գնման համաձայնություն ստացանք: Ստացվում է, որ եթե մենք դրանք գնենք՝ մեր հարկն ավելանում է: Չգիտենք ինչ անել»,- ասաց Թումասյանը:

«Շիրակ կենտրոնի» ղեկավարը լուծումը տեսնում է կենտրոնի գույքը բռնագանձելու մեջ, թեեւ կարծում է, որ իրենք պատժելի ոչինչ չեն արել.

«Պարգեւատրելու փոխարեն պետք է բռնագանձո՞ւմ անեն էս 10 տարվա աշխատանքի, Գյումրիում իրականացրած սոցիալական հեղափոխության համար»,- տարակուսում է նա եւ նշում, որ սա է Հայաստանում առկա վիճակի իրական պատճառը. «Միայն օտարի պատճառով չի այսպես: Նույնիսկ բարեգործության մենաշնորհն են իրենցով ուզում անել: Ուզում են ասել, որ մարդուն չես կարող լավ բան անել, եթե իրենց տիրապետության, վերահսկողության տակ չես»:

Վերջին տվյալներով Գյումրիում դեռ կան շուրջ 3500 կիսախարխուլ վագոն-տնակ: Արդեն 10 տարի է՝ Գյումրիում գործում է «Շիրակ կենտրոնը»: Ընկերությունն անապահովներին վառլեփայտ, տուն է տրամադրում, որոնք ձեռք են բերվում հովանավորների հետ բանակցությունների միջոցով: Վահան Թումասյանը մեզ հետ զրույցում ասաց, որ այս տարիների ընթացքում իրենց միջոցով շուրջ 60 բնակարան է նվիրվել անօթեւաններին: «Միայն այս տարի 16 բնակարան արդեն տրվել է, եւս 6-ը ընթացքի մեջ է: Բոլորը 4-5 երեխա ունեցող ընտանիքներ են: Պատկերացրեք շուրջ 100 մարդու կյանք է փոխվել, ճակատագիր է փոխվել»,- ընդգծում է կենտրոնի ղեկավարը:

armtimes.com