«Գյումրին առանց տնակների» ծրագրի համար մեծ գումար է պետք. Վահան Թումասյան 2015-10-22   1872     

2500-2700  գյումրեցիներ դեռևս ապրում են տնակներում, իսկ որպեսզի նրանք ապահովվեն բնակարաններով, անհարժեշտ է բավական մեծ գումար, որը Գյումրիի քաղաքապետ Սամվել Բալասանյանի՝ «Գյումրին առանց տնակների» նոր ծրագրով չի կարող լուծվել մոտ ժամանակներում. Tert.am-ի հետ զրույցում նման տեսակետ հայտնեց «Շիրակ կենտրոն» ՀԿ նախագահ Վահան Թումասյանը:

Հիշեցնենք, որ Գյումրու քաղաքապետ Սամվել Բալասանյանը հայտարարել էր, թե աշխատավարձ չի ստանալու այնքան ժամանակ, քանի դեռ կա տնակում բնակվող թեկուզ մեկ գյումրեցի: Նա ներկայացրել էր «Գյումրին առանց տնակների» ծրագիրը և նշել, որ այն իրականացնելու համար անհրաժեշտ է թափանցիկ հիմունքներով գործող հիմնադրամ:

Վահան Թումասյանի մոտավոր հաշվարկներով՝ 50-60 մլն դոլար է անհրաժեշտ, որպեսզի ծրագիրը կյանքի կոչվի, իսկ այդքան ըստ նրա՝ նույնիսկ Հայաստանի հիմնադրամը չի կարող հավաքել:

Դիտարկմանը, այսինքն՝ քաղաքապետի հայտարարությունն աշխատավարձից հրաժարվելու մասին երկար ժամանակո՞վ է՝ Վահան Թումասյանը նշեց, թե իր տեղեկություններով Սամվել Բալասանյանն այդ աշխատավարձը չէր էլ ստանում և փոխանցում էր քաղաքի զարգացման հիմնադրամին, որն ավագանիների  կողմից հաստատված տարբեր ծրագրեր է իրականացնում:  

Այս ծրագրի կարևոր մասը, ըստ Թումասյանի, այն է, որ տնակներից ազատվելու մասին խոսում է նաև իշխանությունները: «Այն որ մենք 10 տարի է անում ենք և շատ դեպքերում հաջողվում էր և շատ դեպքերում չէ, հիմա արդեն մեզ միացան նաև իշխանությունները»,-ասաց նա:

Բացի այդ, Սամվել Բալասնայանը, ըստ նրա, լավ գործարար է և կատարել է իր՝ մինչ այս տված բոլոր խոստումները. «Եթե ինքը կպել է դրան, ուրեմն հույս կա, որ հարցը կփորձեն լուծել: Եթե աբողջովին չէ, ապա գոնե ինքը հիմքը կդնի»: 

Վահան Թումասյանի խոսքով՝ 27 տարի անց ի վերջո հասկացել են, որ ամենացավոտ տեղն է, և Գյումրին չի կարող այդ ցավից ազատվել, քանի դեռ տնակներ կան:

tert.am