Վագոն-տնակների բնակիչները աղբանոցներից կոշիկ ու անվադող են հավաքել. «Շիրակ կենտրոն» 2015-10-20   1221     

Ձմռանը դեռ մոտ մեկ ամիս ժամանակ կա, բայց Հայաստանի ամենացուրտ հատվածներից մեկում՝ Շիրակի մարզում, ձմեռը շատ ավելի շուտ է սկսվում: Իսկ ջեռուցման հարցը այստեղ խոցելի է հատկապես անօթևան՝ վագոն-տնակներում ապրող ընտանիքների համար: Ձմեռը դեռ չսկսած` Գյումրիի սոցիալական խնդիրներով զբաղվող «Շիրակ կենտրոն»-ը օրական 30-40 զանգ է ստանում: Այս տարի արդեն մոտ100 ընտանիքի վառելափայտ են բաժանել:

«Շիրակ կենտրոն» հասարակական կազմակերպության նախագահ Վահան Թումասյանը NewsBook-ի թղթակցի հետ զրույցում փաստում է` ամբողջ ամառ վագոն-տնակներում ապրող մարդիկ աղբանոցներից կոշիկներ, անվադողեր և այլ իրեր են հավաքել, որպեսզի կարողանան ձմեռը թեկուզև քաղցած, բայց գոնե առանց ցրտահարվելու անցկացնել: «Մարդիկ ապրում են խարխուլ տնակներում, որտեղ ձմռանը ջերմաստիճանը նույնքան է, որքան դրսում: Այս պայմաններում այդ ընտանիքներին հավասարեցնել համեմատաբար նորմալ պայմաններում ապրող մարդկանց հետ ու տալ նույն սոցիալական նպաստը, առհասարակ սխալ է: Նրանց դեպքում սոցիալական նպաստը բավարարում է միայն չոր ու ցամաք հացի համար»,- ասաց Վահան Թումասյանը՝ հավելելով, որ ամեն տարի հասարակական կազմակերպությունը տարբեր միջոցներով իրականացնում է «Ջերմություն անօթևան ընտանիքներին» ծրագիրը:

«Գյումրիի քաղաքապետարանը, մարզպետարանը իրենց միջոցներով որոշակի աջակություն ցուցաբերել, բայց դա կարելի՞ է համարել պետական աջակցություն»,-հարցնում է հ/կ ղեկավարը: Վահան Թումասյանի խոսքով, եթե Հայաստանն իրեն համարում է սոցիալական պետություն, ապա սոցիալապես խոցելի խմբերի համար ծրագրեր պետք է իրականանցի: «Մենք հարյուրավոր առաջարկություններ ենք ուղարկել, բայց դրանք թղթի վրա են մնացել: Պետությունը անհավասար իրավիճակ է ստեղծել: Նման պամաններում ապրող մարդկանց հավասարեցնել համեմատաբար նորմալ պայմաններում ապրող մարդկանց հետ, առհասարակ սխալ է: Եթե պետությունը չի կարողանում բնարականներով ապահովել և աղքատությունը հաղթահարել, մարդկանց գոնե աշխատանքով պետք է ապահովի:
Գոնե սոցիալական ծրագրեր պետք է մշակի»,- նկատում է Վահան Թումասյանը: Վերջինիս խոսքով, աղբանոցներից վառելիք հայթայթելը նաև հոգեբանություն է ձևավորում: «Հիմա մենք, երբ վառելափայտ ենք տրամադրում, հիմնականում չբնակեցված տնակներն ենք քանդում, փայտը բաժանում ենք որպես վառելափայտ, իսկ եթե դա էլ չենք անում, մարդը գնում է, քաղաքի ծառերն է կտրում: Նախորդ տարիներին եղել են դեպքեր, որ գնացել ծառեր են կտրել, որ երեխան չսառչի: Արդյունքում մեծ տուգանքներ են նշանակել»,- ընդգծեց նա: Վահան Թումասյանի դիտարկմամաբ` Երևանում, այլ մարզերում էլ կա աղքատություն, բայց Շիրակի մարզը նրանով է առանձնահատուկ, որ այստեղ 2700 ընտանիք է ապրում փողոցում: «Ոչ միայն աղքատ են՝ այլև անօթևան»,- շեշտում է նա՝ ընգծելով, որ եթե այլ մարզերում աշխատատեղերի ստեղծմամբ կամ նպաստներ բարձրացնելով հնարավոր կլինի լուծել աղքատության հարցը, ապա Գյումրիում հնարավոր չէ, այստեղ նաև բնակարանների հարցն է առկա, ինչը կրկնակի դժվարություն է:

Նյութի աղբյուրը ` Newsbook.am