Հոսանքի թանկացումը չի ազդի ծայրահեղ աղքատների վրա, ինչպես անդունդ գլորվողի վրա 40, թե 45 մետր բարձրությունը. Վ. Թումասյան 2015-06-26   1236     

Որքան էլ զարմանալի է, բայց Գյումրիի տնակային ավաններում բնակվող ծայրահեղ աղքատ սոցիալական շերտի վրա հոսանքի թանկացումը չի էլ ազդի ու չի էլ հուզում նրանց:

Tert.am-ին «Շիրակ» կենտրոնի ղեկավար Վահան Թումասյանն ասաց. «Որովհետև իրենք այլևս այն կողմ տեղ չունեն. երբ մարդը սոված է մեկ շաբաթ, արդեն կարևոր չէ՝ 8 օր, թե 10, կամ եթե էլեկտրաէներգիա չի ծախսում, ձմռան ամիսներին այն երկարատև անջատած է, հիմա մի ամսո՞վ անջատեցին, 40 օրով, էդ խավի համար այլևս միևնույն է,–ասաց նա,-ինչպես եթե մեկն անդունդը գլորվի, կարևոր չէ՝40 մետրի՞ց է անդունդը գլորվում է, թե՞ 45»:

Հիշեցնենք, որ երեկ ՀՀ վարչապետ Հովիկ Աբրահամյանը հայտարարել էր, որ հոսանքի սակագնի վերանայում հնարավոր չէ և որ կառավարությունը սոցիալապես անապահով 105 հազար մարդու թանկացող հոսանքի դիմաց կփոխհատուցի 2000 դրամ:

Վահան Թումասյանը նկատեց, որ այդ թանկացումը ազդելու է գյումրեցիների հիմնական մասի վրա, որոնք արագ կհամալրեն ծայրահեղ աղքատների շարքերը: Ու եթե հիմա ծայրահեղ աղքատները քաղաքում 35 տոկոս և ավելին են, ապա թանկացումից հետո դառնալու են` 70 տոկոս:

«Այսինքն` կգնան, կհավասարվեն տնակային ավանների բնակիչների մակարդակին… Հարուստների վրա էլ չի ազդելու»,-ավելացրեց հասարակական կազմակերպության ներկայացուցիչը:

Հիշեցնենք, որ երեկ Գյումրիում անկցկացվեց բավականին կոլորիտային  բողոքի ցույց, երբ երթը քաղաքի փողոցներով անցնելով` վանկարկում էր` վառե-մարե, վառե-մարե, իսկ շենքերից էլ վառում-հանգցնում էին լույսերը։
 
Վահան Թումասյանը, բոլոր նրանց, ովքեր ակցիայի իմաստը չէին հասկացել, հիշեցրեց, որ ֆիլմը «Մեր մանկության տանգո»-ից է, երբ Սիրանույշն ասում է` «վառե, մարե»:

tert.am