«Մշակութային մայրաքաղաքի փոխարեն Գյումրուն ավելի շատ կսազեր աղքատության մայրաքաղաք անվանումը» 2015-06-11   1227     

Նախօրեին աշխատանքային այցով Գյումրիում գտնվող ՀՀ քաղաքաշինության նախարար Նարեկ Սարգսյանը խոստացավ՝ աղետի գոտի հասկացությունն առաջիկա մեկ-երկու տարում այլեւս չի լինելու, քանի որ քաղաքի  զարգացման նոր ծարագիր է մշակվելու: Նախարարը դա հայտարարեց Գյումրու մի քանի տնակային ավաններ կատարած այցից հետո, ուր գնացել էր  «Շիրակ կենտրոն» ՀԿ նախագահ Վահան Թումասյանի առաջարկով:

-Երեկվա փակ խորհրդակցությունից առաջ Նարեկ Սարգսյանը ցանկություն հայտնեց, որ մենք իրեն ուղեկցենք տնակային ավաններ: Մեկ-երկու տնակային թաղամասում եղանք, ծանոթացավ պայմաններին,- ասում է Վ.Թումասյանը: – Նրա ստացած տպավորույթունից բացի՝ խորհրդակցության սկզբում ես ներկայացրի անօթեւանների ապրելակերպը: Ինքս  չգիտեմ մի երկիր, որտեղ մարդիկ նման ծանր պայմաններում ապրեն, նույնիսկ պատերազմող երկրներում նման իրավիճակ չէ, ինչպես Գյումրու տեքստիլագործների թաղամասի հանրակացարանում կամ մեկ այլ տնակային ավանում:

Թումասյանի կարծիքով՝ անօթեւանության վերացման ամենակարճ ճանապարհը բնակարանային շինարարությունը կլիներ, բայց կառավարությունը ընտրեց խնդրի լուծման այլընտրանքային տարբերակները: Այս դեպքում էլ, ըստ նրա, գոնե պետք է կիրառվի խնդրի կարգավորման այլընտրանքային տարբերակներ՝ տարածքների նվիրատվության, սոցիալական բնակարանների կառուցում եւ այլն.

-Իմ տպավորությունն այն է, որ պետությունը ԲԳՎ-ների այս ծրագրի ավարտից հետո տրամադրված չէ պետական լուրջ, լանամասշտաբ ծրագրեր իրականացնել: Հնարավոր է՝ ամեն տարի մեկ-երկու շենք ամրացնեն կամ մի քանիսին սոցիալական բնակարան տրամադրեն, բայց, ինչքան հասկանում եմ, Մուշ-2-ի նման  լայնամասշտաբ շինարարություն աղետի գոտում այլեւս մտադիր չեն իրականացնել:

Խորհրդակցության ընթացքում նախարարին, ինչպես նաեւ մարզպետին ու քաղաքապետին Վ.Թումասյանը ներկայացրել է իրենց առաջարկությունների փաթեթը, որը կետ առ կետ քննարկվել է, այդ թվում՝ անօթեւանների ցուցակում չհաշվառված, բայց տնակներում ապրող անձանց անվճար տարածք հատկացնելու ու տնակն օրինականացնելու խնդիրը, որպեսի մարդիկ  իրենց միջոցներով կառուցապատելով կարողանան լուծել իրենց բնակարանային խնդիրը:

Ինչ վերաբերում է  նախարարի՝ աղետի գոտին վերացնելու վերաբերյալ հնչեցրած խոստմանը՝ Վ.Թումասյանը նշեց, թե աղետի գոտին հարբերական հասկացություն է, ու չգիտի՝ նախարարը կոնկրետ ինչ նկատի ունի, բայց ակնհայտ է, որ Գյումրին դարձել է  աղքատության մայրաքաղաք.

-Մշակութային մայրաքաղաքի փոխարեն նրան ավելի շատ կսազեր աղքատության մայրաքաղաք անվանումը, որովհետեւ ամբողջ քաղաքով եթե ման գաք, տարբեր մարզերից եկած ծայրահեղ խոցելի խմբերի պատկանող ընտանիքների կհանդիպեք, որովհետեւ Գյումրիում տնակ գտնելն անհամեմատ հեշտ է ու մատչելի, քան բնակարան գնելը, ու ստացվում է, որ ամբողջ հանրապետության աղքատությունն է համախմբվել Գյումրիում:

ԲԳՎ-ների տրամադրման գործընթացը, Թումասյանի կարծիքով, եւս չի կարող լուծել անօթեւանության խնդրը, ու եթե անգամ 50-60 տոկոս արդյունավետությամբ էլ աշխատի, հազիվ 300 ընտանիք բնակարան կունենա, մինչդեռ 3000 ընտանիք դեռ շարունակում է անօթեւան մնալ:

Մարինե Պետրոսյան
asparez.am