Գյումրիում սոցիալական իրավիճակը պայթյունավտանգ է 2015-02-06   1193     

Շիրակի մարզում, մասնավորապես Գյումրիում սոցիալական վիճակը օրեցօր վատանում է, և կարելի է ասել ծայրահեղ, պայթյունավտանգ վիճակ է: Հանրապետության իշխանությունների սառնասիրտ և անտարբեր վերաբերմունքը Գյումրու և գյումրեցիների հանդեպ էլ ավելի է խորացնում գոյություն ունեցող ճգնաժամը:

«Շիրակ կենտրոնը» բազմիցս է անդրադարձել հատկապես անօթևան սոցիալապես ծանր վիճակում ապրող ընտանիքների խնդիրներին: Այսօր, ավագանու հերթական նիստի ընթացքում, Գյումրիում տիրող սոցիալական ծանր վիճակի մասին հայտարարությամբ հանդես եկավ Գյումրու քաղաքապետ Սամվել Բալասանյանը:
Ներկայացնում ենք հայտարարությունն ամբողջությամբ.

«Հարգելի համաքաղաքացիներ
Ավելի քան 26 տարի է անցել 88-ի աղետից, երբ մեր ծաղկուն քաղաքը լրջագույն խնդիրների բախվեց՝ կորցնելով իր տնտեսական պոտենցիալի եվ բնակֆոնդի մեծ մասը: Խնդիրներ, որոնք առայսօր լուծված չեն՝ չնայած իրականացված բազմաթիվ պետական եվ բարեգործական ծրագրերին:
Գյումրիում ներկայումս կա ավելի քան 3520 տնակ, որոնցից 2970-ը բնակեցված է, ավելի քան 9000 մեր համաքաղաքացի դեռևս ապրում են անմարդկային պայմաններում, առանց նորմալ ջերմության ու անգամ լողանալու հնարավորությունների:
Գյումրիում կա 88 վթարային շենք, որոնցում բնակվում է մոտ 1000 ընտանիք:
Գյումրու փողոցների մոտ 70 տոկոսը քանդված կամ կիսաքանդ վիճակում են:
Գործազրկության եվ աղքատության ցուցանիշները մեր քաղաքում գտնվում են անհագստացնող բարձր մակարդակում:
Սրանք են այն հիմնական խնդիրները, որոնք խոչընդոտում են մեր քաղաքի բնականոն զարգացմանը:
Ակնհայտ է, որ այս խնդիրների լուծման համար անհրաժեշտ են լուրջ ֆինանսներ եվ որ Գյումրին իր ներկա կարգավիճակով եվ բյուջեով չի կարող նույնիսկ ոչ թե բեկում, այլեւ նկատելի տեղաշարժ ապահովել վերոնշյալ հարցերում: Ազատ մնացած գումարով վ հնարավոր չէ եվ քաղաքի ընթացիկ խնդիրները լուծել եվ վերականգնել քաղաքը: Նորմալ աղբահանություն, փողոցների լուսավորում, բարեկարգման աշխատանքներ, շենքերի տանիքների ու մուտքերի նորոգում, փոքր սոցիալական օգնություններ ծայրահեղ պայմաններում գտնվող մեր համաքաղաքացիներին եվ տարեկան մեկ կամ երկու փողոցների ասֆալտապատում, սա է այն առավելագույնը, որ հնարավոր է անել մեր քաղաքի միջոցներով: Ինչը իհարկե չի կարող բավարարել ոչ ինձ եվ ոչ էլ Ձեզ:
Որպես Գյումրու քաղաքապետ, վստահ եմ, որ միայն ամենալայն կոնսոլիդացիայի ճանապարհով եվ պետական հստակ ծրագրերի իրագործմամբ է հնարավոր Գյումրու համար բեկումնային ու առաջանցիկ զարգացում ապահովել:
Իրավիճակն այնպիսին է, որ անհրաժեշտ է մարզային ու քաղաքային իշխանությունների, Ազգային Ժողովի պատգամավորների, Ավագանու անդամների, քաղաքացիական սեկտորի, հայրենակցական միությունների, մտավորականության եվ Սփյուռքի մեր հայրենակիցների համախմբված աշխատանքը:
Խնդրի լուծումը տեսնում եմ Գյումրու նոր կարգավիճակի եվ ֆինանսավորման մեջ, ինչի հետ կապված անհրաժեշտ է հանդես գալ օրենսդրական նախաձեռնությամբ :
Միևնույն ժամանակ, ցանկանում եմ նշել, որ բաց եմ ցանկացած առաջարկի եվ գաղափարի քննարկման համար:
Հարգանքով ՝ Ձեր քաղաքապետ Սամվել Բալասանյան»: