Գյումրիում մարդիկ տներից դուրս չեն գալիս 2015-01-12   1336     

Գյումրիում զանգվածային հանրահավաք չի կայացել, քանի որ կատարված սպանության պատճառով քաղաքի բնակիչները խուճապային տրամադրության մեջ են և տներից դուրս չեն գալիս:
Այս մասին Lragir.am-ին Գյումրիից փոխանցեց Շիրակ կենտրոն ՀԿ նախագահ Վահան Թումասյանը՝  նշելով, որ մի խումբ երիտասարդներ քիչ առաջ քաղաքի հրապարակում մոմավառություն են իրականացրել, բայց զանգվածային ակցիա չի եղել:

«Այս պահին մի քիչ հանգստացել են փողոցները, ի տարբերություն կեսօրվա ոստիկանական մեքենաներ չենք նկատում: Մարդիկ մեկը մյուսին զանգում ու խորհուրդ են տալիս փակվել տներում ու դուրս չգալ: Առհասարակ Գյումրին հատկապես երեկոյան ժամերին աչքի չէր ընկնում մարդաշատ փողոցներով, էլ ուր մնաց այս խուճապային իրավիճակում մարդկանց կարողանան փողոց հանել: Ամբողջ քաղաքն այդ ցավալի դեպքի պատճառով շոկի մեջ է, միտինգային տրամադրությունները հնարավոր է հետագայում լինեն»,- ասաց Թումասյանը:

Նրա փոխանցմամբ՝ քաղաքի կենտրոնում ոստիկանական ուժերի կուտակում չի նկատվում երեկոյան ժամերին, ինչպես առավոտյան և կեսօրին էր: «Երևի կոնկրետ տեղերում են փնտրում հացագործին: Դեպքի վայրի փողոցը շրջապատված է ոստիկանների կողմից, հատուկ ստորաբաժանումներ են բերվել Երևանից»,- ասաց նա:

Վահան Թումասյանի կարծիքով՝  եթե օտար զորամիավորում կա քաղաքում, այն էլ նման հսկա ռազմաբազա, այդ քաղաքը պետք է հատուկ և արագ արձագանքող ստորաբաժանումներ ունենա: «Այսօր խուճապահար ու վազող ոստիկաններ էինք տեսնում, մարդու մեղք էր գալիս: Նման դեպքերում պետք է տեղական հատուկ ուժերի գործողություններ իրականացվեն այդ քաղաքում, լրացուցիչ հսկողություն, ոստիկանական լրացուցիչ ուժեր»,- ընդգծեց նա:

Վահան Թումասյանը նկատեց, որ սա ռուսական ռազմաբազայի հետ կապված առաջին ողբերգությունը չէ Գյուրմրում: Բայց հստակ չէ, թե նախորդ դեպքերում մեղավորներն ինչ պատիժ կրեցին: «Ոչ ոք չի կարող ասել, թե նախորդ դեպքերում ով քանի տարի պատիժ կրեց: Սովորաբար նման դեպքերում տանում են իրենց երկիր և այնտեղ զինվորական կարգով դատապարտում, և ոչ ոք տեղեկություն չի ունենում հետագայի մասին»,- ասաց նա:

Վահան Թումասյանը նաև նշեց, որ երկրաշարժի հետևանքները չվերացնելու պատճառով Գյումրին վիրավոր քաղաք է և գերզգայուն է նման դեպքերի հանդեպ: «Ամեն նման դեպք բերում է կրկնակի հիասթափության, արտագաղթի, ընկճվածության: Նման դեպքերը միանգամից սթրեսի մեջ են գցում քաղաքի բանկչությանը»,- նշեց նա:

See more at: http://www.lragir.am/index/arm/0/country/view/108921#sthash.LS172v7r.dpuf