Վահան Թումասյան. «Տեսնենք՝ էլ ի՞նչ օյինբազություն են բերելու անտուն մարդկանց գլխին 2014-10-03   1220     

Հոկտեմբերի 2-ին ՀՀ կառավարության նիստում քննարկվել է նաեւ Գյումրու՝ երկրաշարժի հետեւանքով անօթեւան մնացած ընտանիքների բնակարանների խնդիրը: Որոշվել է խնդիրը լուծել բնակարանների գնման վկայագրի միջոցով եւ այդ նպատակով 1.5 մլրդ դրամ է հատկացվել Շիրակի մարզպետարանին, իսկ գործընթացի պատասխանատու նշանակվել է Շիրակի մարզպետը: Սա ծրագրի առաջին փուլն է, որով բնակարանի գնման վկայագիր կհատկացվի 215 ընտանիքի, եւս 252 ընտանիք ԲԳՎ կստանա ծրագրի երկրորդ փուլով:

«Շիրակ կենտրոն» ՀԿ նախագահ Վահան Թումասյանի մեկնաբանմամբ՝ այս գործընթացում բավականին հետաքրքիր զարգացումներ են սպասվում. «Տեսնենք՝ էլ ի՞նչ օյինբազություն են բերելու անտուն մարդկանց գլխին: Բնականաբար, «Շիրակ կենտրոնը» հետեւելու եւ մշտադիտարկում է իրականացնելու ամբողջ գործընթացը: Նախորդ տարիներին, ԲԳՎ-ների տրամադրման միջոցով, անօթեւանության խնդիրը լուծելու փորձերի պատճառով այսօր ունենք հարյուրավոր անօթեւան ընտանիքներ, ովքեր նախկինում ստացել են ԲԳՎ-ներ, բայց չեն գնել բնակարաններ ու շարունակում են ապրել խարխուլ վագոն-տնակներում»:

Վ.Թումասյանի կարծիքով, անօթեւանների համար կառավարությունը պետք է բնակարաններ գներ եւ բաշխեր, ինչի մասին ինքը բազմաթիվ անգամ է խոսել: Նրա ներկայացմամբ՝ կան ծայրահեղ վիճակում ապրող անօթեւաններ, ովքեր գումարը չբավականացնելու պարագայում չեն կարողանա գումար ավելացնել ու բնակարան գնել եւ կրկին կկանգնեն խնդրի առաջ:

-430 թե 450 անօթեւանների գրեթե 80 տոկոսը ի վիճակի չէ կոպեկ ավելացնելու: Ես հասկանում եմ, որ կառավարությունը, որոշ ժամանակ անց, ստիպված կլինի վերանայել այս գործընթացը: Կառավարությունը, պարզապես, պետք է խառը տարբերակ վերցներ, ովքեր ցանկանում էին բնակարան գնել՝ գումարը տային, ովքեր չէին համաձայնի գումարի հետ՝ պետությունը ինքը գներ եւ տար այդ ընտանիքներին,-ավելացրեց Վ.Թումասյանը:

Կառավարության նիստից հետո կայացած ասուլիսի ժամանակ ՀՀ քաղաքաշինության նախարար Նարեկ Սարգսյանը ընդգծել է, թե 2015-2016թ-ին ամբողջովին լուծված կլինի աղետի գոտու բնակարանների խնդիրը. «Շահառուների նախնական թիվը 430 էր, մոտ 20 ընտանիքներ դատարանի միջոցով ապացուցել են իրենց շահառու լինելը: Այս որոշումով լուծվում է 215-ի խնդիրը: Հաջորդ կեսի խնդիրը կլուծենք 2015թ-ին, եւ աղետի գոտուց տուժածների հարցն արդեն լուծված կլինի»,-նշել է Ն.Սարգսյանը:

Նախարարի կարծիքով, բնակարանների տրամադրման այս տարբերակը ճիշտ եղանակ է, այն նաեւ աշխուժություն կմտցնի անշարժ գույքի Գյումրու շուկայում: ԲԳՎ-ն մարդկանց նաեւ հնարավորություն կտա բնակարանի ընտրություն կատարելու.«Սա փորձված եղանակ է, կիրառվել է նախկինում եւ դրական արդյունքներ է տվել»,-ավելացրել է Ն. Սարգսյանը:

Անդրադառնալով Նարեկ Սարգսյանի՝ 2015-2016թթ-ին անօթեւանության խնդրի ամբողջովին լուծված լինելու դիտարկմանը, Վ.Թումասյանը նկատեց, որ նման խոսքեր մենք արդեն 25 տարի լսում ենք եւ, որ ինքը ամենառաջինն է, որ ցանկանում է  քաղաքաշինության նախարարի ասածներն իրականություն դառնան.«Ցավոք, իշխանությունների, համայն հայության՝ անօթեւանության եւ աղետի գոտու հանդեպ ունեցած վերաբերմունքը այդ մասին չի խոսում, այլ ճիշտ հակառակն է, մենք դեռ երկար տարիներ վագոն-տնակներ եւ անօթեւանության խնդիր ենք ունենալու, մասնավորապես՝ Գյումրիում»:

Վ.Թումասյանը ընդգծեց, որ ներկայումս իշխանություններն ավելի ուշադիր են տնակների տարածքների ազատման հարցի նկատմամբ ու ԲԳՎ-ի կիրառման դեպքում տնակների թիվն ինչ-որ չափով կպակասի Գյումրիում, բայց ոչ ամբողջապես կվերանա, որովհետեւ Գյումրիում 3000 ընտանիք պաշտոնապես անօթեւան ու շահառու ճանաչված չէ եւ, բնականաբար, պետությունն այդ ընտանիքների հանդեպ պարտավորություն չի ստանձնում:

-Անօթեւանների հերթացուցակում ոչ թե 432, այլ մոտ 1000 ընտանիք է մնացել, մնացածի խնդիրները ո՞նց են լուծելու: Ընտանիքներ կան, որ փաստաթղթերն ուշացրեցին՝ կամ բացակա էին, կամ սեփական տուն էին կորցրել, կամ դրամական փոխհատուցման ենթակետի տակ էին, բա այդ ընտանիքների խնդիրը ինչպե՞ս է լուծվելու,-ավելացրեց Վ.Թումասյանը:

Զրուցակցիս մեկնաբանմամբ՝ իր կողմից նշված այս մոտ 600 ընտանիքները մնալու են անտուն, կամ շարունակելու են վարձով բնակվել:

Սոնա Առաքելյան
asparez.am