Լոս Անջելեսում հեռուստամարաթոն է անցկացվել 2014-09-12   1210     

Սեպտեմբերի 7-ին ԱՄՆ Կալիֆորնիա նահանգի Լոս Անջելոս քաղաքում «Հայաստան համահայկական հիմնադրամը», «Շանթ» հեռուստաընկերության հետ համատեղ, հեռուստամարաթոն են անցկացրել՝ Գյումրու անօթեւաններին բնակարաններ գնելու նպատակով: Նախնական պայմանավորվածության համաձայն՝ հավաքագրված գումարը հիմնադրամը կրկնապատկելու էր, ապա նոր օգտագործելու բուն նպատակով:

6 ժամ տեւած մարաթոնի ընթացքում հավաքագրվել է մոտ 700 հազար դոլար, որը  նախատեսված է մոտ 20 ընտանիքի բնակարաններ գնելու ու կահավորելու համար: «Շիրակ կենտրոն» ՀԿ նախագահ Վահան Թումասյանը, ով այս պահին զբաղված է կազմակերպիչներին անօթեւանության խնդրի մասին տեղեկություններով իրազեկելու ու իրենց պատրաստած տեսանյութերով օգնելու գործով, նշում է, թե բնակարաններն ում ու ինչպես կտրամադրեն՝ կազմակերպիչների խնդիրն է, ինքը դրա հետ որեւէ առնչություն չունի, բայց միաժամանակ առաջարկում է բնակարանների տրամադրման իր տարբերակը. «Իրենք նախնական նախատեսել էին 20 բնակարան գնել ու կահավորել: Կարծում եմ, ավելի ճիշտ կլիներ առանց կահավորանքի թողնել բնակարանները, փոխարենը, ինչքան հնարավոր է, շատ բնակարաններ գնել՝ պայմանով, որ բնակիչները տնակներն անպայման քանդեն ու տարածքներն ազատեն: Ես կողմ եմ նաեւ, որ բարեգործական ծրագրերով գնված բնակարանները տրամադրեն այն ընտանիքներին, որոնք պետության կողմից փոխհատուցման ենթակա չեն, շահառու չեն ճանաչվել: Այսինքն՝ պետության փոխարեն բնակարաններ չտրամադրեն, պետությունն իր պարտականությունը կատարի, բարեգործականները՝ իրենց»:

Վ.Թումասյանն համոզված է, որ շահառու չճանաչվածների ճակատագիրն անհայտ է եւ այդ 700.000 դոլարով հնարավոր կլինի, մոտավորապես, 40 բնակարան գնել, ընդ որում՝  նա առաջարկում է ոչ միայն բազմազավակ ընտանիքներին բնակարաններ տրամադրել, այլեւ չանտեսել միայնակ մայրերին եւ մյուս խմբերին.«Գուցե իրենք այնքան ծանոթ չեն իրավիճակին, մենք պատրաստ ենք  իրենց ամբողջ իրավիճակը ներկայացնել, իհարկե, անվճար, ինչպես միշտ ենք արել: Դա շատ բարդ պրոցես է, որովհետեւ կան մարդիկ, որ տնակներում են ապրում, բայց ինչ-որ տեղ բնակարան ունեն, սակայն գերադասում են տնակները: Այդ ողջ պրոցեսին պետք է մասնագիտորեն մոտենալ»:

Վահան Թումասյանի տվյալներով, այս պահին անօթեւանների հերթացուցակից դուրս շուրջ 3000 ընտանիք կա, որ ապրում է կամ ժամանակավոր կացարաններում կամ գործարանային հանրակացարաններում եւ չեն համարվում երկրաշարժի հետեւանքով ուղղակի անօթեւաններ դարձած: Այս ընտանիքների հանդեպ պետությունը որեւէ պարտավորություն չունի: Իսկ նախատեսած 430 բակարանների շինարարությունը, ամենայն հավանականությամբ, ոչ էլ կյանքի կկոչվի, փոխարենը նորից կսկսեն գործարկել ԲԳՎ-ների բաժանելու տարբերակը.«Թեեւ որոշում դեռ չկա, բայց տրամադրություններն ակնհայտ են»:

Մարինե Պետրոսյան
asparez.am