Սփյուռքը կարծես դեմքով դեպի աղետի գոտի է շրջվում. իսկ պետությո՞ւնը (video) 2014-09-05   1203     

Աղետի գոտում, մասնավորապես Գյումրիում երկրաշարժի հետևանքով ավելի քան քառորդ դար անօթևան ընտանիքների բնակարանային ապահովման խնդիրների մասին սեպտեմբերի 4-ին, Երևանի «Ելակետ» մամուլի ակումբում ասուլիս էր հրավիրել «Շիրակ կենտրոնի» նախագահ Վահան Թումասյանը: Մամուլի ասուլիսում բանախոսը, անդրադառնալով ժամանակավոր կացարաններում բնակվող հարյուրավոր անօթևան ընտանիքների սոցիալական ծանր պայմաններին, հայտնեց նաև մի ուրախալի լուր: «Երկար դադարից հետո հայկական սփյուռքը որոշել է բնակապահովման ծրագրեր իրականացնել Գյումրիում, ինչն, անխոս, ուրախալի է.  կյանքը ցույց տվեց, որ միայն Հայաստանի և պետական միջոցների հաշվին անհնար է ամբողջովին վերականգնել աղետի գոտին»:

   Վ. Թումասյանը հայտնեց, որ սեպտեմբերի 7-ին Լոս Անջելեսում «Շանթ» հեռուստաընկերության հիմնադրման 20-ամյակին նվիրված հեռուստամարաթոն է կազմակերպվելու, որի ընթացքում հանգանակված գումարը կրկնապատկվելու է  «Հայաստան» hամահայկական hիմնադրամի կողմից և հասույթը տրամադրվելու է Գյումրիում անօթևան ընտանքների համար բնակարանների գնմանը: Ի դեպ, Գյումրու անօթևան ընտանիքներին աջակցության ծրագրեր են նախապատրաստվում նաև Կանադայի «Գոլոլեան հիմնադրամի» նախաձեռնությամբ և Գերմանիայի հայ համայնքի կողմից:

   Բանախոսը, պատասխանելով լրագրողների հարցերին, նշեց, որ անշուշտ, «Շիրակ կենտրոնի» կողմից պարբերաբար անօթևան ընտանիքների խնդիրների   հանրայնացման, ինչպես նաև Գյումրու իշխանության գործունեության ազդեցությունն էլ կա, որ անօթևան ընտանիքներին բնակարաններով ապահովելու գործում մասնակցություն է ունենում սփյուռքը:«Արդեն 400 տեսանյութ ենք պատրաստել անօթևան ընտանիքների մասին, որոնք լայն արձագանք են գտել ինչպես Հայաստանում, այնպես էլ արտերկրում: Գյումրիում առկա սոցիալական խնդիրների մասին պարբերաբար բարձրաձայնում է և քաղաքապետ Սամվել Բալասանյանը, ինչն արեց նաև ամիսներ առաջ ԱՄՆ կատարած այցելության ընթացքում»,-ասաց Վահան Թումասյանը:

   Ստորև ներկայացնում ենք հատվածներ մամուլի ասուլիսից:

shirakcentre.org