Անօթեւանների համար դեռեւս հստակ որոշում չկա 2014-08-27   1187     

1988-ի երկրաշարժից 25 տարի անց գյումրեցի հազարավոր ընտանիքներ դեռեւս շարունակում են ապրել վաղուց արդեն շարքից դուր եկած տնակներում:

Նրանցից ոմանք բնակարան ունենալու հույս էլ չունեն. կամ բնակարան չեն կորցրել, բայց տնակում են ապրում, կամ ժամանակին ստացել են, բայց ինչ-ինչ պատճառներով դրանից զրկվել, իսկ ոմանք՝ դեռ սպասում են կորցրած բնակարանի փոխարեն նորը ստանալուն: Անօթեւանության հերթացուցակում ընդգրկված հարյուրավոր ընտանիքներ այսօր արդեն սպասում են կառավարության նոր որոշման, սակայն, եթե կառավարությունն իր բոլոր որոշումները եւ խոստումները կարողանար կատարեր, ապա նրանց մի մասը բնակարանամուտ արդեն իսկ տոնած կլինի, բայց…

Ժողովրդի աչքը խաբելու ու հերթական հավաստիացումներով մարդկանց սնելու համար դեռ 2013-ին Մուշ-ում սկսեցին շինաշխատանքներ, բայց շենքերի կառուցման աչքփակոցին՝ հիմքերի փորումից այդպես էլ առաջ չգնաց, իսկ արդեն 2014-ի գարնանն սկսեցին խոսել այլ տարբերակի մասին՝ բնակարաններ գնել եւ բաժանել բնակիչներին: Հուլիսին, երբ քաղաքաշինության նախարար Նարեկ Սարգսյանը, վարչապետ Հովիկ Աբրահամյանի հետ Շիրակի մարզում էր՝ ընդգծել էր, որ «կոնկրետ առաջարկը կլինի բնակարաններ գնելը, որպեսզի լինի արագ եւ հարցը լուծվի մինչեւ այս տարվա վերջ կամ հաջորդ տարվա սկիզբ»:

Անօթեւանության խնդիրներով զբաղվող «Շիրակ կենտրոն» ՀԿ-ի նախագահ Վահան Թումասյանը մեզ հետ զրույցում նշեց, որ իր ունեցած տեղեկություններով, վերջնական եզրակացություն ու տարբերակ չկա: Նա խոսեց նաեւ բնակարանների բաշխման անօթեւանների առաջարկած տարբերակների մասին: «Շիրակ-կենտրոնի» ղեկավարի տեղեկացմամբ՝ անօթեւանների մի մասը համաձայն է ԲԳՎ-ին, մի քիչ է գումար վրան ավելացնելու ու իր ցանկացած բնակարանը գնելու համար, մի մասը բնակարան է ուզում, կգնեն՝ կտան, թե կկառուցեն՝ կտան, իրենց չի հետաքրքրում, իսկ մյուս մասն էլ՝ կողմնակից է բնակարանաշինությանը, նրանք չեն շտապում:

-Դրա համար, ես կարծում եմ, որ պետք է խառը տարբերակն ընտրվի: 1-2 շենք տարեկան կառուցվի, զուգահեռ կիրառվի ԲԳՎ-ի տարբերակը, ու նաեւ բնակարանը գնվի եւ հատկացվի անօթեւան ընտանիքին,-ավելացրեց Վ.Թումասյանը:

Զրուցակիցս նկատեց, որ իրենք տարբեր միջազգային 

կազմակերպությունների, հայ համայնքների, դոնորների հետ են աշխատում եւ շատ շուտով բնակարանների գնման ու բաշխման նոր ծրագիր է իրականացնելու անօթեւանության հերթացուցակում չգտնվող ընտանիքների համար: Վ.Թումասյանը սոցիալական բնակարանով ապահովելու տարբերակը եւս խնդրի լուծման տարբերակ է համարում. «Բնակարանով ապահովման ծրագիրը աղետի գոտում պետք է գնա տարբեր ուղղություններով, մի ուղղություն ընտրելը՝ սխալ է Խնդիրն այնքան է խորացել, որ մի ուղղությամբ գնալն անհնար է»,-ավելացրեց Վ.Թումասյանը:

Թե ԲԳՎ-ով, թե բնակարան գնելով, եւ թե բնակարանաշինության անօթեւան ընտանիքներին բնակարանով ապահովման ծրագրի ձգձգումը՝ Վ.Թումասյանի կարծիքով, ավելի շատ հոգեբանական է եւ ոչ թե՝ ֆինանսական. «Հայերիս մեջ մի քիչ ցուցամոլություն, մոդայի ետեւից գնալ կա ու քանի որ 1988-ի աղետից քառորդ դար է անցել, արդիականությունը կարծես թե կորցրել է եւ իշխանությունների, եւ սփյուռքի, եւ հասարակության համար: Հիմա արդիական այլ խնդիրներ կան, որոնց ետեւից գնում են: Ամբողջովին չեն գիտակցում այն խնդիրը, որ կա աղետի գոտում»:

Թե խնդրի հետ կապված ի՞նչ նորություններ կան եւ հարցն ինչպիսի՞ լուծում է ստանալու՝ փորձեցինք պարզել նաեւ Շիրակի մարզպետարանից: Մարզպետարանի քաղաքաշինության վարչության պետ Ալբերտ Մարգարյանը արձակուրդում էր, բայց լրատվական բաժնից փոխանցեցին, որ հարցը քաղաքաշինության նախարարությունում քննարկվել է, բայց իրենց ունեցած տեղեկություններով՝ դեռեւս հստակ որոշում չկա:  Քաղաքաշինության նախարարությունից եւս մեզ փոխանցեցին, որ հարցն ընթացքի մեջ է, այս պահի դրությամբ հստակ որեւէ բան չկա:

Սոնա Առաքելյան
asparez.am