ԲԳՎ-երի «զոհ» համարվող ընտանիքների թիվը մոտ 2000 է 2014-08-26   1164     

Շիրակի մարզի Ախուրյան համայնքում երկրաշարժի հետևանքով անօթևան մնացած ընտանիքների համար կառուցվող շենքի շինաշխատանքներն օրերս դադարեցվել են: Պաշտոնական որևէ մեկնաբանություն չկա, թե որն է պատճառը, իսկ ոչ պաշտոնական տեղեկություններով՝ կառուցապատող «Գլենդել Հիլզ» ընկերությունը ֆինանսական խնդիրներ ունի:

Այս շենքերի շինարարությունը կառավարությունը պետք է ավարտած լիներ 2012 թվականի դեկտեմբերին, սակայն ծրագրի ժամկետները չեն պահպանվել, իսկ անօթևան ընտանիքներն անորոշության մեջ են: Շենքերում բնակարանները նախատեսված են մոտ 70 ընտանիքի համար:

«Շիրակ կենտրոն» ՀԿ նախագահ Վահան Թումասյանը Lragir.am-ի հետ զրույցում ասաց, որ տեղի ունեցածի վերաբերյալ Քաղաքաշինության նախարարությունից որևէ պարզաբանում չեն ստացել, Շիրակի մարզպետարանը նույնպես լռում է: «Խոսակցություններ կան, որ պատճառը ֆինանսական խնդիրներն են, պաշտոնական որևէ հաղորդում չկա»,- ասաց նա:
Ախուրյանից բացի, անօթևանների խնդիրը սուր է նաև Գյումրիում: Թեև կառավարությունը խոստանում էր, որ արդեն 2013 թվականին Գյումրիում երկրաշարժի հետևանքով անօթևան ընտանիք չի լինի, սակայն այսօր նմանօրինակ մոտ 900 ընտանիք կա հանրապետության երկրորդ քաղաքում: Այս ընտանիքները մինչ օրս միայն խոստումներ են լսում, դրանցից 432 ընտանիքի հարցը կառավարությունն այս փուլում քննարկում-քննարկում է, բայց հստակ լուծում չի առաջարկում:

«Մեր այն կասկածները, որ աղետի գոտու շինարարությունը կդադարեցվի, իրականություն դարձավ: Երբ որ այս տարվա հուլիսին վարչապետն ու քաղաքաշինության նախարարը եկան Գյումրի, հարցում էին անցկացրել՝ այդ 432 ընտանիքներն ուզում են, որ բնակարան կառուցվի իրենց համար, թե՞ բնակարանի գնման վկայագրեր ստանան: Քանի որ այդ ընտանիքները լավ գիտեն, որ նոր շենքի կառուցումը շատ երկար կտևի, մեծ մասը պատասխանել էին, որ ԲԳՎ-ին համաձայն են: Բայց պայմանն այն է, որ ոչ թե այդ ԲԳՎ-ն տան քաղաքացուն և ասեն՝ գնա, բնակարան գտիր քեզ, այլ պետությունը գնի բնակարաններն ու տրամադրի նրանց»,- ասաց Վահան Թումասյանը:

Նրա խոսքով՝ ԲԳՎ-ների բաժանման դեպքում արհեստականորեն բարձրանում են բնակարանների գները, այդ պատճառով մարդիկ չեն կարողանում հարմար բնկարաններ գտնել, գումարը ծախսում են այլ նպատակով:
Գյումրիում ԲԳՎ-երի «զոհ» համարվող ընտանիքների թիվը մոտ 2000 է: Վերոնշյալ 432 ընտանիքներին բնակարանով ապահովելու մասին Քաղաքաշինության նախարար Նարեկ Սարգսյանն ասել էր, որ բնակիչներին քաղաքապետարանը կհրավիրի քննարկման, մարդկանց պահանջով կառավարությունը կամ նոր շենք կկառուցի, կամ ԲԳՎ կբաժանի:
Վահան Թումասյանն ասում է, որ կառավարությունը աղետի գոտու անօթևանների առաջ հարցը կտրուկ է դնում՝ բնակարանաշինությո՞ւն եք ուզում, թե ԲԳՎ: Այնինչ խնդրի լուծման այլ տաբերակներ էլ կան, որոնցից են, օրինակ, պետության կողմից բնակարանների գնումն ու վիճակահանության միջոցով անօթևաններին բաժանելը, սոցիալական բնակարանաշինության իրականացումը:

Գյումրիում երկրաշարժի հետևանքով անօթևան է դեռևս 900 ընտանիք, ևս 400 ընտանիք՝ ամբողջ Շիրակի մարզում: Բացի այդ, Գյուրիում անօթևան է մոտ 3500 ընտանիք, որոնք չեն համարվում աղետի հետևանքով տուժածներ: Երկրաշարժի հետևանքով անօթևան մնացած բոլոր ընտանիքները, կառավարության նախկին խոստումների համաձայն, պետք է նախորդ տարեվերջին ապահովված լինեին բնակարաններով:
«Աղետի գոտու նկատմամբ համայն հայության ու իշխանությունների կողմից ուշադրություն չկա: Այլևս այդ թեման արդիական չէ, դրա համար էլ այս վերաբերմունքն է արժանացել աղետի գոտին»,- ասում է Վահան Թումասյանը:

- See more at: http://www.lragir.am/index/arm/0/country/view/103264