ՀՀ քաղաքաշինության նախարարն էլ խոստովանեց… 2014-07-09   1111     

Երբ նախորդ ամիս ՀՀ քաղաքաշինության նախարարության պաշտոնյաների հետ հանդիպումից հետո հայտարարեցի, որ իշխանությունները որոշել են չվերսկսել Գյումրիում վաղուց դադարեցված բնակարանաշինությունը («Գյումրու անօթևան ընտանիքների համար նախատեսված բնակարանաշինությունը առնվազն մեկ տարով էլ հետաձգվեց»), քաղաքաշինության ոլորտի պաշտոնյաները փորձեցին հերքել հայտարարությունս:

Այսօր ՀՀ վարչապետի հետ Շիրակի մարզ ժամանած նորանշանակ քաղշիննախարար Նարեկ Սարգսյանը Գյումրու Մուշ-2 թաղամասում դադարեցված բնակարանաշինության վերսկսման մասին հարցին ի պատասխան բառացիորեն հայտարարեց, որ ինքը տրամաբանություն չի տեսնում բնակարաններ կառուցելու մեջ, այլ կողմ է ինչպես Մուշ, այնպես էլ այլ թաղամասերից ու համայնքներից բնակարաններ գնելու տարբերակին: Բնակարանաբար, խոսքը վաճառքի հանված բնակարանները պետության կողմից գնելու , ապա անօթևան ընտանիքներին բաժանելու մասին է: Նախարարի այս հայտարարությունում մի հետաքրքիր պահ էլ կա: Սկսեմ մի փոքր հեռվից: Վերը հիշված հանդիպման ժամանակ ՀՀ քաղաքաշինության փոխնախարար Արմեն Ղուլարյանին ու նախարարության վարչություններից մեկի պետ Եվգենյա Աթայանին հակադարձելով՝ առաջարկել էի, որ եթե այնուամենայնիվ բնակարանների գնման վկայականներ են կրկին ներդրվելու, ապա հաշվի առնելով նախորդ դառը փորձը, բնակարանները գնվեն պետության կողմից և ոչ ամենևին անօթևան ընտանիքների, ապա վիճակահանության ճանապարհով բաժանվեն շահառուներին:

Նախկինում անօթևաններին ԲԳՎ-ների տրամադրման գործընթացը ցույց է տվել որ, նախ, այն արտագաղթի պատճառ է դառնում, և երկրորդ՝ ԲԳՎ-ների տրամադրումն արդյունավետ չէ, քանի որ պետությունը բնակարանների շուկայական գներին համապատասխան գումար չի տրամադրում շահառուներին, իսկ անօթևանները, ստանալով գումարը, բնակարաններ չեն գնում, այլ կեղծ գործարքների միջոցով գումարը ստանում ու օգտագործում են այլ նպատակներով, ինչի արդյունքով լավագույն դեպքում շարունակում են բնակվել խարխուլ կացարաններում: Այնուամենայնիվ ստացվում է, որ ՀՀ կառավարությունն ու մասնավորապես քաղաքաշինության նախարարության պաշտոնյաները, որ զարմանքով ու տարակուսանքով էին վերաբերվել մեր այդ առաջարկությանը, հավանաբար երկար մտորելուց հետո համոզվել են «Շիրակ կենտրոնի» նաև այս առաջարկության տրամաբանական լինելու մեջ ու համաձայնել են այդ տարբերակին: Ոչինչ, որ մի բառով անգամ չեն նշում առաջարկությունը ներկայացնողին: Կարևորն այն է, որ աղետի գոտում ավելի քան քառորդ դար վագոն-տնակներում պատսպարված ընտանիքները վերջապես բնակարան ունենան:

Վահան Թումասյան
Լուսանկարը` aravot.am-ի

shirakcentre.org