Գյումրիում երկրաշարժից տուժած 1200 ընտանիք դեռ սպասում է բնակարանի 2014-12-01   1108     

Գյումրիում այսօր անօթևանների հերթացուցակում հաշվառված և պետության կողմից փոխհատուցման ենթակա մոտ 1200 ընտանիք կա, ավելացրած դրան կա նաև մոտ 3000 ընտանիք, որոնք տարբեր պատճառներով չեն համարվում պետության կողմից փոխհատուցման ենթակա: Մոտեցող ձմռան և կոմունալ վարձավճարների բարձրացման հետ ավելի է սրվում նրանց սոցիալական պայմանները: Tert.am-ի հետ զրույցում Ազգային ժողովի գյումրեցի պատգամավոր Սուքիաս Ավետիսյանը և «Շիրակ» կենտրոնի ղեկավար Վահան Թումասյանն անդրադարձել են ինչպես նրանց խնդիրներին, այնպես էլ պետությունից սպասվող աջակցության հարցին:

«Այո՛, այսօր լուրջ խնդիր ունենք տնակային ավանների հետ կապված»,- ընդունեց ՀՀԿ-ական պատգամավորը՝ շարունակելով. «Գյումրիում մենք ունենք 4500-5000 տնակներ, ժամանակավոր կացարաններ, որտեղ բնակվում են մարդիկ: Նրանց մեջ երկրաշարժից անօթևանները մոտ 1000-ն են, մնացածն արդեն տարբեր սոցիալական խմբերից են: Պետք է նախ հասկանանք, թե ինչպիսի սոցիալական խմբերի հետ գործ ունենք, պետք է լուրջ վերլուծություն արվի, և մտածվի ապագայում բացի անօթևանների մասին մտածելուց, մտածվի նաև սոցիալական բնակարանաշինության կամ այլ սոցիալական ծրագրեր իրականացնելու մասին, որպեսզի մենք կարողանանք այդ ժամանակավոր կացարաններից ձերբազատվել»:

Պատգամավորը նշեց, թե տնակային ավանները շատ մեծ անհարմարություն են ստեղծում քաղաքի ճարտարապետական տեսքի, սանիտարական վիճակի հարցում:

«Մյուս կողմից էլ, այսօր կան մարդիկ, որ սովորել են տնակային պայմաններին, որովհետև տնակային պայմաններում կոմունալ ծառայությունների վարձերն ավելի քիչ են մուծում: Չեմ թաքցնում, որ մարդ կա՝ այսօր բնակարան ունի, ժամանակին բնակարանը կամ վաճառել է, կամ այդ բնակարանը կա, բայց չգիտես ինչու, ինքը մնացել և բնակվում է ավտոտնակում»,- ասաց պատգամավորը:

Սուքիաս Ավետիսյանը չի կարծում, թե պետք է թիրախ վերցնել այն, որ եթե երկրաշարժից հետո անօթևան են մնացել, ուրեմն պետությունը պետք է իրենց օժանդակի: «Էլի եմ ասում, այստեղ սոցիալական խնդիր է և մենք պետք է հասկանանք, թե որ ընտանիքին ինչ ձևով պետք է օժանդակենք: Կարող է անօթևան է, բայց այդ անօթևանը շատ լավ սոցիալական վիճակում է և իրեն անհրաժեշտություն չկա օգնելու: Այսինքն, մենք պետք է հասկանանք, թե ում ենք ուզում օգնել»,-նշեց նա:

Պատգամավորի փոխանցմամբ՝ այսօր Կառավարությունում դեռ հստակ չի քննարկվել այդ ընտանիքների խնդիրը. «Բայց կարծում եմ, որ շատ մոտ ապագայում այն կքննարկվի և այդ մասով կփորձեն ինչ-որ լուծումներ գտնել: Մենք չպետք է մոռանանք, որ բյուջեի խնդիր ունենք»,- ավելացրեց Ավետիսյանը:

Ըստ «Շիրակ» կենտրոնի ղեկավար Վահան Թումասյանի՝ այսօր ունենք մոտ 12 000 քաղաքացի, ովքեր ապրում են կա՛մ տնակային ավաններում, կա՛մ քարուքանդ գործարանային հանրակացարաններում, կա՛մ կիսաքանդ շենքերում, որոնք առանց տանիքի են և ավելի ծանր պայմաններում են, քան՝ տնակներն են:

«Իսկ այդ տնակներն էլ այս 26 տարիների ընթացքում ամբողջովին շարքից դուրս են եկել»,- ասաց նա՝ նշելով, թե այդ ընտանիքներից ընդամենը 444-ին են ճանաչել և բնակարանների գնման վկայականներ տվել, իսկ մնացածների հանդեպ որևէ պետական ծրագիր ապագայում նախատեսված չէ:

«Կոմունալ թանկացումները և ձմեռային ցուրտ ամիսներն առաջինը հարվածում են այդ սոցիալական շերտին: Եթե մտնեք տնակային ավաններում կամ այդ կիսաքանդ շենքերում պատսպարված ընտանիքներ, կտեսնեք զանգվածային հիվանդ, հաշմանդամություն ունեցող մարդկանց: Բնական է, որ տարիների ընթացքում այդ պայմանները պետք է բերեին այդ հիվանդությունների աճին: Այդ մարդկանց հանդեպ պետության կողմից սոցիալական որևէ պարտավորություն կամ արտոնություն՝ համեմատած բարեկեցիկ ապրող ընտանիքների, չկա, բացառությամբ մոտ 100 երեխաների համար անվճար մանկապարտեզներ հաճախելու հնարավորությունը, որը տրվեց Գյումրու քաղաքապետարանի կողմից: Սա շատ փոքր թիվ է, բայց հասկանալի է նաև, որ քաղաքապետարանը սահմանափակ բյուջե ունի»,-արձանագրեց Թումասյանը:

Վերջինս ասաց նաև, թե գազի վարձավճարի փոխհատուցման ինչ-որ ծրագիր կա, բայց քանի որ տնակային ավանները և կիսախարխուլ շենքերը գազիֆիկացված չեն, հետևաբար այդ ընտանիքները չեն կարող արտոնություններից օգտվել, քանի որ իրենց բնակարանները գազիֆիկացված չեն:

«Փորձում ենք մեր հնարավորությունների սահմաններում, որը շատ փոքր է, մեղմել այդ ընտանիքների ծայրահեղ ծանր վիճակը՝ նրանց վառելափայտ բաժանելով»,-նշեց Վահան Թումասյանը:

tert.am