Նպատակը` տնակում ողջ մնալն է. «Հարթակ» թերթի հյուրը «Շիրակ կենտրոն» ՀԿ-ի նախագահ Վահան Թումասյանն է 2014-11-06   1568     

Թեև ՀՀ կառավարությունն ամեն տարի նոր թվեր է հրապարակում 88-ի երկրաշարժի հետևանքով տնակներում ապրող անտուններին նոր բնակարաններով ապահովելու վերաբերյալ, բայց, չգիտես ինչու, դեռ հարյուրավոր ընտանիքներ մնացել են անօթևան: «Հարթակ» թերթի հյուրը «Շիրակ կենտրոն» ՀԿ-ի նախագահ Վահան Թումասյանն է:

- Պարոն Թումասյան, օրերս Դուք հարցում էիք ուղղել ՀՀ իշխանություններին Գյումրիում երկրաշարժի հետևանքով անօթևան ընտանիքներին բնակարաններով ապահովելու ընթացքի մասին, ստացե՞լ եք պատասխան, արդյոք գոհացուցի՞չ է այն:

- Բնակարանային ապահովման ծրագիրն իրոք քանի տարի է՝ ձգձգվում է, ինչն իսկապես շատ մտահոգիչ է: Աղետի գոտու հարյուրավոր ընտանիքներին հուզող ՀՀ քաղշիննախարարությանն ուղղված հարցման պատասխանը, այո, ստացել ենք: Այն, թերևս, մեզ համար պարզ էր, բայց ինչպես ասում են` դրա կրկնակի պարզաբանման կարիքը կար: Իհարկե, այն չի գոհացնում. պատասխանում դարձյալ խոսվում է իշխանությունների որդեգրած քաղաքականության մասին`անօթևանների ընտանիքներին ինչ-որ ժամկետում բնակարաններով ապահովելու մասին:  

- Ըստ Ձեզ, ինչո՞ւ է ձգձգվում անօթևանների բնակարանային հարցի լուծումը: 25  տարի շարունակ խոստումներ ենք լսում, բայց ինչպես ասում են` սայլը տեղից չի շարժվում:

-Իշխանությունների կողմից միայն խոստումներ են հնչում: Եթե իշխանության խոստմանը հավասար նաև աշխատանք լինի, ամեն ինչ լավ կլինի, բայց որ չկա, արդեն հուսահատեցնող է: Բացի այդ, այժմ էլ նոր խնդիրներ են առաջացել` բնակարանային փոխհատուցման, փաստաթղթերի ձևավորման, խնդիր է նաև համայն հայության անտարբեր վերաբերմունքը:Աղետի գոտու թեման այլևս կորցրել է իր արդիականությունը, այն առաջվա պես չի հուզում մարդկանց և սփյուռքին, առավելևս իշխանություններին: 88-ի երկրաշարժի թեման հնացած է, և այսօր ունենք այն, ինչ ունենք: Ցավոք սրտի, իշխանությունների որդեգրած քաղաքականությունն էլ հիմնականում խոստումներ տալն ու իրական պատկերը թաքցնելն է:

- Ձմեռն էլ այս տարի շուտ եկավ: Ինչպե՞ս են տնակներում ապրող մարդիկ դիմակայելու ցրտաշունչ ձմռանը:

- Վագոն -տնակներում բնակվող հարյուրավոր ընտանիքներից միայն մի փոքր մասն ունի ինքնուրույն վառելիք ձեռք բերելու հնարավորություն: Նրանց մեծ մասը ծայրահեղ չքավոր վիճակում է: Տնակներում փոքրիշատե ջերմություն ապահովելն այսօր ամենակարևոր խնդիրն է, չմոռանանք, որ նրանց տնակները հիմնականում քարուքանդ վիճակում են, վառարանի ջերմությունն էլ չի պահպանվում:

Հարցազրույցն ամբողջությամբ կարդացեք թերթի այսօրվա համարում:
hartak.am