Նամակ – դիմում 2010-10-24   1285

2008թ. հոկտեմբերի 26-ին Գյումրիում կայացած
ՏԻՄ ընտրությունների և ՀՀ Ընտրական օրենսգրքում
փոփոխություններ կատարելու մասին

ՀՀ Նախագահ Սերժ Սարգսյանին
ՀՀ Վարչապետ
Տիգրան Սարգսյանին
ՀՀ ԱԺ նախագահ
Հովիկ Աբրահամյանին

Հարգելի պարոն Նախագահ, պարոն Վարչապետ և պարոն ԱԺ նախագահ,

2008թ. հոկտեմբերի 26-ին Գյումրիում կայացած ՏԻՄ ընտրությունները և հաջորդած հետընտրական զարգացումները ցույց տվեցին, որ համայնքներում մեր հասարակությունը ցանկանում է  ունենալ իրական, կայացած տեղական ինքնակառավարման համակարգ: Սակայն ընտրական ողջ գործընթացը և հատկապես բուն քվեարկության արդյունքների հաշվարկը ցույց տվեց, որ մեր երկրում գործող ՀՀ Ընտրական օրենսգրքում առկա են մի շարք բացթողումներ, որոնք խանգարում են հատկապես ավագանու ինստիտուտի կայացմանը նպատակաուղղված արդար և թափանցիկ ընտրությունների անցկացմանը: Ուստի դիմում ենք Ձեզ, ակնկալելով, որ ՀՀ Ընտրական օրենսգրքում փոփոխություններ կատարելիս հաշվի կառնվեն նաև ներքոհիշյալ դիտողությունները և առաջարկությունները.
1. Տեղամասային ընտրական հանձնաժողովներին տալ միայն քվեարկությունը կազմակերպելու և անցկացնելու լիազորություններ, քվեարկության արդյունքների ամփոփումը տեղափոխել ընտրատարածքային ընտրական հանձնաժողովներ, ավելացնելով քվեարկության արդյունքների ամփոփման համար նախատեսված ժամանակը:

2. ՏԻՄ ընտրություններում 50 հազարից ավել ընտրողներ ունեցող համայնքներում համայնքի ղեկավարի և ավագանու անդամների ընտրությունները առանձնացնել և անցկացնել առնվազն վեցամսյա ժամանակային տարբերությամբ:
3. ՏԻՄ ընտրություններում համայնքի ղեկավարի և ավագանու անդամների միաժամանակ անցկացվող ընտրությունների դեպքում առաջին հերթին ամփոփել ավագանու անդամների ընտրությունների արդյունքները:
4. Ընտրատարածքային ԸՀ-ի կողմից քվեարկության արդյունքների վերահաշվարկի կարգում կատարել փոփոխություն.

ա) 24 ժամով ավելացնել վերահաշվարկի պահանջի մասին դիմումների ընդունման ժամանակահատվածը,
բ) վերահաշվարկի համար նախատեսված ժամանակահատվածը երկարացնել մինչև բոլոր պահանջների բավարարումը:
5. Քվեաթերթիկում վերականգնել բոլորին դեմ քվեարկելու համար նախատեսված տողը:

Ինչպես նաև Հանրապետության երկրորդը համարվող քաղաքում ընտրողների մոտ ավագանու ինստիտուտի հանդեպ վստահություն առաջացնելու և առհասարակ այդ ինստիտուտի կայացման նպատակով առաջարկում ենք`  տեղական հանրաքվեի մասին օրենսդրությամբ (ՀՀ Սահմանադրություն, ՏԻ հանրաքվեի մասին օրենք, ՀՀ ՏԻՄ օրենք, ՀՀ Ընտրական օրենսգիրք և իրավական այլ ակտեր) սահմանված կարգով 2009թ. գարնանը Գյումրիում անցկացնել ավագանու արտահերթ ընտրությունների անցկացման նպատակահարմարության մասին հանրաքվե:

Հարգանքով`
Վահան Թումասյան
<<Քաղաքական մշակույթի և համաձայնությունների զարգացման
ՀԿ   նախագահ:

Գյումրի, 3 նոյեմբերի, 2008թ.

Պատասխաններ
ՀՀ Արդարադատության Նախարարություն 19.11.08  պատասխան
ՀՀ Կենտրոնական Ընտրական Հանձնաժողովի Նախագահ Գ.Ազարյան պատասխան