Ուխտագնացություն ի պաշտպանություն հայալեզու կրթության 2010-09-02   1250

Կիրակի, սեպտեմբերի 5-ի առավոտյան մի շարք հասարակական կազմակերպություններ եւ քաղաքացիական նախաձեռնություններ անցկացնելու են ուխտագնացություն դեպի Օշականի սբ. Մեսրոպ Մաշտոց եկեղեցի`  հայ դպրության հայր Մեսրոպ Մաշտոցի գործին մեր հավատարմությունը ևս մեկ անգամ փաստելու նպատակով:

Այսօր, երբ Ազգային ժողովի կողմից առաջին ընթերցմամբ ընդունված տխրահռչակ նախագծերով աննախադեպ սրությամբ վտանգվում է մայրենի լեզվով կրթվելու հայ երեխայի իրավունքը և հայ ինքնության արդիականացման հնարավորությունը, առավել քան կարևորվում է Մաշտոցի գործունեության խորհուրդը:
Հայոց լեզվով դպրության հազարվեցհարյուրամյա պատմությունը նրա  պարբերական նորացման վկայությունն է: Այսօր ևս այն ունի բավարար հիմքեր` համապատասխանելու իր ժամանակի պահանջներին և նորանալու, բայց ոչ երբեք օտարալեզու դառնալու գնով:

Միևնույն ժամանակ, ուխտագնացութան մասնակիցները ցանկանում են ընդգծել 21-րդ դարում ի հայտ եկած նոր մարտահրավերներին արձագանքելու և լեզվի ժամանակակից խնդիրները լուծելու անհրաժեշտությունը:

Ժամը 13:00-ին ուխտագնացության մասնակիցները Երևանում միանալու են «Հանուն հայալեզու կրթության» կարգախոսով անցկացվելիք երթին, որը կմեկնարկի Մատենադարանի մոտ և Մաշտոցի պողոտայով կձգվի դեպի Սուրբ Սարգիս եկեղեցի:

Ուխտագնացությանը եւ երթին կարող են միանալ բոլոր այն քաղաքացիները, ովքեր կիսում են վերը նշված մտահոգություններն ու գաղափարները:

Ժամանակացույց և նշումներ
Ժամանում  Օշական` սեպտեմբերի 5-ին, 10:00:
Ժամանում Երեւան Մատենադարան` 12:30
Երթի սկիզբ` 13:00
Տրանսպորտային հարցերը հարկ է լուծել ինքնուրույն:
Ուխտագնացության մասնակիցներ
«Արարատ ռազմավարագիտական կենտրոն» ՀԿ
«Դեմոկրատիա այսօր» ՀԿ
«էԼԲԱ» (էլեկտրոնային բովանդակության ասոցիացիա)
Իրանահայեր լրատու ցանց
«Լեզվի ժողովրդական տեսչություն» քաղաքացիական նախաձեռնություն
«Հայազն Երիտասարդների Միաբանություն» ՀԿ
«Հանուն մարդկային կայուն զարգացման» ասոցիացիայի
«Ձեռք» երիտասարդական կրթական ՀԿ
«Մենք դե՛մ ենք օտարալեզու դպրոցների վերաբացմանը» հասարակական նախաձեռնություն
«Նոր պահպանողական շարժում» ՀԿ
«Շիրակ Կենտրոն» ՀԿ
«Սարդարապատ» շարժում
«Սերունդ» ՀԿ