2018-ին «Շիրակ կենտրոնի» անելիքները 2018-01-16   337     

2018-ին «Շիրակ կենտրոնի» անելիքները

 

 

 

 

 

 

 

 

 

 

 

 

Բնականաբար «Շիրակ կենտրոնի»շարունակելու է իրականացնել Շիրակի մարզում աղքատության կրճատմանը նպատակաուղղված, սոցիալապես անապահով, հատկապես տնակային ավաններում բնակվող ընտանիքներին և երեխաներին աջակցության բարեգործական լայնամասշտաբ ծրագրերը: Այդ թվում անօթևան ընտանիքներին բնակարանների նվիրաբերում, թերսնվածությունը մեղմելու և կացարաններում փոքրիշատե տանելի պայմաններ ստեղծելու նպատակով հիգիենիկ պարագաների և սննդամթերքի բաժանում, սոցիալապես ծանր պայմաններում ապրող ընտանիքների երեխաներին դպրոց հաճախելու նպատակով պայուսակների, գրենական պիտույքների, հագուստի և այլ անհրաժեշտ պարագաների բաժանում, տնակներում և կիսախարխուլ կառույցներում բնակվող ընտանիքներին ձմռան վառելափայտի տրամադրմում և իհարկե, Գյումրին վաղուց շարքից դուրս եկած վագոն-տնակներից մաքրում:

Սակայն 2018-ին մենք նպատակադրվել ենք առավելապես զարկ տալ նաև կրթադաստիարակչական, արհեստագործական, պատանիների և երիտասարդների, մեղմ ասած զարգացման ծրագրերին մի քանի ուղղություններով: Այս պահին Գյումրու մի խումբ տաղանդաշատ երիտասարդ ստեղծագործողների , արհեստավորների և արվեստագետների մասնակցությամբ պատրաստում և համալրում ենք արհեստագործական, ուսումնական կենտրոնի նյութա-տեխնիկական բազան: Շատ շուտով կավարտենք երեք ուսումնական ուղղություններից երկուսի դասասենյակների կահավորումը: Ներկայացվող աշխատանքների մեծ մասը անում ենք առանց ֆինանսական միջոցների` մեր ձեռքերով, իսկ պահանջվող սարքավորումների և դասասենյակների կահավորմանը և նյութա-տեխնիկական բազայով աջակցող հովանավորների մասին կհաղորդենք ավելի ուշ, դասասենյակների պատրաստ լինելուն պես:

Հ. Գ. Անշուշտ` վերոհիշյալը այն ամենը չէ, ինչ նախատեսվում է իրականացնել 2018-ին, միջազգային կազմակերպությունների և անհատ բարերարների հետ համագործակցությամբ իրականացվելիք բազմաթիվ այլ ծրագրերի վերաբերյալ, մանրամասն տեղեկատվություն կհրապարակենք կատարվելիք աշխատանքներին զուգընթաց:

Վահան Թումասյան

Կայքի հոդվածների մասնակի կամ ամբողջական մեջբերումներ անելիս հղումը պարտադիր է: Հոդվածներում արտահայտված կարծիքները պարտադիր չէ, որ համընկնեն «Շիրակ կենտրոնի» տեսակետի հետ: Գովազդների բովանդակության համար կայքի խմբագրակազմը չի կրում պատասխանատվություն: