Երկրաշարժի հետևանքները չվերացնելու արդյունքում հանրապետության աղքատությունը հավաքվում է Գյումրիում. Վահան Թումասյան 2017-12-07   1274     

Թեև Սպիտակի երկրաշարժից 29 տարի է անցել, սակայն ինչպես «Շիրակ կենտրոն» ՀԿ նախագահ  Վահան  Թումասյանը Tert.am-ի հետ զրույցում նշեց, մոտ 2300 ընտանիք ապրում է ժամանակավոր այդ կացարաններում` տնակներում, կամ հանրակացարաններում, շատ վտանգավոր իրավիճակում, իրավունքների ոտնահարմամբ, տարրական պայմանների բացակայությամբ, առանց ջեռուցման, սովի մատնված: 

«2300 ընտանիքների կեսն ուղղակի երկրաշարժի հետևանքով են այդ վիճակում հայտնվել, կեսը ոչ ուղղակի. կա՛մ մեծ ընտանիք են եղել, կիսվել են, կա՛մ այլ համայնքից են եկել, կա՛մ բնակարանն են վաճառել, մնացել անտուն»,-ասաց նա:

Հիշեցնենք, որ Սպիտակի երկրաշարժից անցել է 29 տարի: 1988թ. դեկտեմբերի 7-ին՝ տեղական ժամանակով ժամը 11.41-ի 22,7 վայրկյանին Հայաստանի մոտ 40 տոկոսը ընդգրկող տարածքում տեղի ունեցավ ավերիչ երկրաշարժ՝ էպիկենտրոնում 10 բալ ուժգնությամբ:

Վահան Թումասյանը նշեց, որ ամեն օր շփվում է աղետի հետևանքը կրող մարդկանց հետ, և թվում է, թե ժամանակը կանգ է առել ու երկրաշարժից անցել է ոչ թե 29 տարի, այլ 29 ամիս, 29 օր: 

«Մենք չկարողացանք ամենակարևորը անել` վերացնել երկրաշարժի հետևանքները, ինչի պատճառով նոր խնդիրներ առաջ եկան՝ մասնավորապես աղքատությունն ավելացավ, և ստեղծվեցին տնակային ավաններ, որոնք մեկուսացած կյանքով են ապրում: Այդ համայնքները աղքատ խավին մագնիսի պես ձգեցին, այլ մարզերից ևս եկան վարձով ապրելու, ու կարծես ամբողջ հանրապետության աղքատությունը հավաքվում է Գյումրիում, իսկ Գյումրիի գործարար խավը արտագաղթեց: Պատահական չէ, որ այսօր Գյումրին ամենաբարձր աղքատության ցուցանիշն է գրանցել»,-ասաց նա և նշեց, որ բնակարան չունեցողների խնդիրները ավելի են խորանում:

Վահան Թումասյանը նշեց, որ պետությունը կառավարման առումով զրոյական արդյունք է գրանցել:
«Բնակարաններ են կառուցել, փողոց են նորոգել և այլն, սակայն ընդհանուր առմամբ հետևանքների վերացման և պետության երկրորդ քաղաքի բնակչության կենսապահովման մթնոլորտ ապահովելու առումով զրոյական արդյունք է, և դրա ամբողջ մեղքը իշխանությունների վրա է»,-ասաց նա:

Ինչ վերաբերում է Գյումրիում կառավարության նախատեսած ծրագրերին, նա ասաց, որ կառավարությունը տասնյակ ծրագրերի մասին է խոսել, և դա ավելի շատ արվում է հանրային լսարանը, մամուլը լցնելու համար: 

«Այլ բան է նստել տաքուկ գրասենյակում համակարգչի առաջ և նայել կառավարության լոզունգները, այլ բան է մարդկանց հետ շփվելը»,-ասաց նա և նշեց, որ երբ խոսվում է աղքատության, թերսնված երեխայի մասին, պետք է հանդիպել, ծանոթանալ անօթևանի պայմաններին: 

«Ես իրենց չեմ մեղադրում, իրենք պարզապես չունեն պատշաճ ինֆորմացվածություն»,-հավելեց նա:

Լիանա Առաքելյան