Մի երեխայի մասին գիտեինք՝ ամռանը շինարարությունում էր աշխատում, խոստացել է չբացակայել դասերից. Վահան Թումասյան 2017-09-07   185     

Մի երեխայի մասին գիտեինք՝ ամռանը շինարարությունում էր աշխատում, խոստացել է չբացակայել դասերից. Վահան Թումասյան

Արդեն չորրորդ տարին է «Շիրակ» կենտրոնն իրականացնում է «Ոչ մի երեխա դպրոցից չպետք է դուրս մնա գրենական պիտույքներ և հագուստ չունենալու պատճառով» խորագիրը կրող բարեգործական ձեռնարկը, որի շրջանակներում պայուսակներ, գրենական պիտույքներ և հագուստ են տրամադրում անապահով ընտանիքների երեխաներին։

Կենտրոնի ղեկավար Վահան Թումասյանն Aysor.am-ի թղթակցին պատմեց, որ այս տարի ևս շարունակել են ծրագիրը՝ ավելացնելով «Հազար պայուսակ՝ հազար սոցիալապես անապահով ընտանիքների երեխաներին» ակցիան։

«Այս պահին 330 երեխայի տրամադրվել են պայուսակներ ու գրենական պիտույքներ։ Դրանք բոլորը բարձր որակի են։ Մեծ մասին տրամադրվել է նաև կոշիկ ու հագուստ», - ասաց Վահան Թումասյանը։

Թեև հաշվառում չեն իրականացրել, բայց ամենօրյա շփումներից գիտեն, թե որ ընտանիքներում կան երեխաներ, ովքեր ռիսկային գոտում են գտնվում։

Վահան Թումասյանն ասաց, որ Երևանից որոշ երիտասարդներ հանգանակություն են արել և իրենց տրամադրել 80 պայուսակ, Գերմանիայում բնակվող հայազգի բարեկամից ստացել են 160 պայուսակ, ԱՄՆ-ից ևս բազմաթիվ  պայուսակներ են ստացել։

Նա նշեց, որ այս պահին տեղեկություն չունի որևէ երեխայի մասին, որը դասագիրք կամ պայուսակ չունենալու պատճառով դուրս է մնացել ուսումնական գործընթացից։

«Մի երեխայի մասին գիտեինք, որ ամռանը շինարարությունում էր աշխատում՝ օրական վաստակալով 500-ից 1000 դրամ։ Իրեն ևս հատկացրեցինք գրենական պիտույքներ ու պայուսակ։ Խոստացել է, որ չի բացակայի դասերից», - ասաց Վահան Թումասյանը։

www.aysor.am

Կայքի հոդվածների մասնակի կամ ամբողջական մեջբերումներ անելիս հղումը պարտադիր է: Հոդվածներում արտահայտված կարծիքները պարտադիր չէ, որ համընկնեն «Շիրակ կենտրոնի» տեսակետի հետ: Գովազդների բովանդակության համար կայքի խմբագրակազմը չի կրում պատասխանատվություն: