Կառավարության ծրագիրը գրողը երևի երիտասարդ է, չի հիշում, որ 30 տարի առաջ Հայաստանում երկրաշարժ է եղել. Վահան Թումասյան 2017-06-24   281     

Կառավարության ծրագիրը գրողը երևի երիտասարդ է, չի հիշում, որ 30 տարի առաջ Հայաստանում երկրաշարժ է եղել. Վահան Թումասյան

«Շիրակ կենտրոն» հասարակական կազմակերպության ղեկավար Վահան Թումասյանը զարմացած է, որ Կառավարության 2012-2017 թթ. ծրագիրը գրողները Լոռու և Շիրակի մարզերի զարգացման ծրագրերում, ռազմավարություններում 1988 թ.-ի երկրաշարժի հետևանքով անօթևան մնացածների մասին նշումներ անելը հարկ չեն համարել:

Tert.am-ի հետ զրույցում  Վահան Թումասյանն ասաց. «Կառավարությունը փորձում է անտեսել մոտ 10-12 000 մարդու ողբերգություն: Ինչ ասեմ… երևի մոռացել են նրանց մասին… կամ ծրագիր գրողը երիտասարդ է, չի իմանում, որ 30 տարի առաջ Շիրակի մարզում աղետ է ունեցել: Բայց, եթե նա երիտասարդ է, էդքան Գյումրիից ու Շիրակի մարզից ընտրված պատգամավոր կան, գոնե կառավարության ծրագրի քննարկման ժամանակ բարձրաձայնեին»:

Գյումրու անօթևանների խնդիրներին քաջածանոթ Վահան Թումասյանն արձանագրում է, որ, փաստորեն, մարզպետարաններն աղետի գոտու վերացումն իրենց ռազմավարական ուղղությունը չեն համարում, այն դեպքում,  երբ միայն Լոռում կա 345 նման ընտանիք:

Վահան Թումասյանը նշեց, որ 1988-ի Գյումրու երկրաշարժը դարի աղետն էր, բայց նաև ավելացրեց. «Բայց, եթե դարի աղետն էր, դա չի նշանակում, որ այդ աղետի հետևանքների վերացումը ևս պետք է դարձնել դարի հարց: Հասկանալի է՝ 30 տարի է անցել, և  իշխանությունները մտածում են, որ հասարակությունը, մարդիկ էլ են այդպես մտածում: Այն դեպքում, երբ միայն Գյումրիում 3000 ընտանիքներից ավելի ապրում են ծայրահեղ աղքատության և հակահիգիենիկ ու անմարդկային պայմաններում՝«դոմիկ» կոչված տարածքում,   որտեղ մարդու բոլոր իրավունքները խախտված են»:

Նրա խոսքով, որ իզուր է իշխանությունը մտածում, որ անօթևանների խնդրի մասին Կառավարության ծրագրում չնշելով ու մոռանալով այդ հիմնախնդրի գոյության մասին, մտածում են, որ հասարակությունը ևս կմոռանա:

«Հիմա շատ շուտով՝ ձմռան մոտ կհասունանա էդ թեման, որովհետև այդ մարդիկ ձմռան ամիսներին սոսկալի պայմաններում են ապրում: Հիմա ես չգիտեմ՝ իշխանություններն ինչով են մտածում: Առահասարակ, Հայաստանի իշխանություններին հասկանալու համար առնվազն պետք է Նոբելյան մրցանակակիր լինես»,-ավելացրեց նա:

Ըստ Վահան Թումասյանի՝ ավելի լավ կլիներ, որ իշխանությունն այդ անօթևանների գոնե քիչ, բայց բնակարանային խնդիրները լուծեր:

Անուշ Դաշտենց

Աղբյուրը՝ tert.am

Կայքի հոդվածների մասնակի կամ ամբողջական մեջբերումներ անելիս հղումը պարտադիր է: Հոդվածներում արտահայտված կարծիքները պարտադիր չէ, որ համընկնեն «Շիրակ կենտրոնի» տեսակետի հետ: Գովազդների բովանդակության համար կայքի խմբագրակազմը չի կրում պատասխանատվություն: