«Շիրակ կենտրոնի» ևս մեկ հաջողված պատմություն 2017-05-19   169     

«Շիրակ կենտրոնի» ևս մեկ հաջողված պատմություն

Կարծում եմ շատերն են տեղյակ, որ «Շիրակ կենտրոնը» ամեն տարի վագոն-տնակներում բնակվող անօթևան հարյուրավոր ընտանիքների, ձմռան ամիսներին ջերմություն պարգևելու նպատակով, հարյուրավոր խորանարդ մետր վառելափայտ է բաժանում:Ինչպես նաև մեր գրասենյակի բակում, հինգ գամփռներ և Վանա կատուների երկու ընտանիք էին բնակվում: 
Մի խոսքով վառելափայտի կուտակման պահեստարանի և գամփռներին առավել հարմարավետ պայմաններ ստեղծելու նպատակով այլևս բավարար չէր մեր կենտրոնի բակի տարածքը:
Ի դեպ իմ երազանքն է անտառները հատելու փոխարեն անօթևան ընտանիքներին որպես ձմռան վառելիք, կիսախարխուլ վագոն-տնակները քանդելուց առաջացած փայտանյութի տրամադրումը: 
Նախորդ տարի տասնյակ բարեգործական ծրագրեր իրականացրեցինք: Ինչպես նաև անօթևան 19 ընտանիքների բնակարաններ նվիրեցինք: Նրանցից շատերի տնակները, ինչպես նաև չբնակեցված տասնյակ դոմիկներ ձեռք բերեցինք, դրանց քանդոցքից առաջացած փայտը նախորդ ամռանը բաժանեցինք դոմիկներում ապրող ընտանիքներին: Ձմռան շեմին նրանցից գրեթե ոչ մեկը այդ փայտից չուներ, ամռանը օգտագործել էին՝ էլեկտրաէներգիա խնայելու նպատակով: 
Մի խոսքով անցնեմ բուն իմաստին: Մեր կառույցի հարևանությամբ գտնվող տնակային ավանից երկու ընտանիքների ևս բնակարաններ նվիրեցինք: Քանդեցինք նրանց դոմիկները, կուտակված աղբը տասնյակ բեռնատար մեքենաներով մաքրեցինք այդ տարածքներից, ապա քանդած դոմիկների թիթեղներով մի մեծ տարածք ցանկապատեցինք: Ցանկապատված և շրջակա տարածքի ծառերը էտեցինք և մշակեցինք, կառուցեցինք անհամեմատ մեծ բներ մեր գամփռների և կատուների համար, քանդված դոմիկների փայտը սկսեցինք կտրատել և լցնել պարկերը: Ամբողջ ամառ կփորձենք ձեռքներս ընկած փայտը պահեստավորել և ձմռան շեմին միայն բաժանել անօթևան ընտանիքներին: Այս ճանապարհով կփորձենք հնարավորինս խնայել անտառները: Այս ծրագրին կրկին մեծ աջակցություն են ցուցաբերել «Շիրակ կենտրոնի» բարեգործական բազմաթիվ ծրագրերի հովանավորներն ու լավագույն բարեկամները: 
Ահա այդ տարածքի լուսանկարները: Մի հրաշք վայր է դարձել, ուր սկսել են ծաղկել բալենիներն ու եղևնիները:

Վահան Թումասյան

Կայքի հոդվածների մասնակի կամ ամբողջական մեջբերումներ անելիս հղումը պարտադիր է: Հոդվածներում արտահայտված կարծիքները պարտադիր չէ, որ համընկնեն «Շիրակ կենտրոնի» տեսակետի հետ: Գովազդների բովանդակության համար կայքի խմբագրակազմը չի կրում պատասխանատվություն: