«Շիրակ կենտրոնի» առօրյան. Մեր տեսանյութերի արձագանքները շարունակվում են 2014-05-26   1244     

Նախ ուզում ենք մեր խորին երախտագիտությունը հայտնել բոլոր բարի մարդկանց ու կազմակերպություններին` մեր տեսանյութերին արձագանքելու և դրանցում ներկայացված կարիքավոր մարդկանց, հատկապես ծնողազուրկ երեխաներին աջակցություն ցուցաբերելու համար։

Իրոք աննախադեպ արձագանքներ ունեցավ «80-ամյա պապիկը միայնակ խնամում է 5 երկկողմանի ծնողազուրկ թոռնիկներին» տեսանյութը։ Տեսանյութում ներկայացված երկկկողմանի ծնողազուրկ 5 երեխաներին օգնության ձեռք մեկնեցին ինչպես Հայաստանի, այնպե էլ արտերկրի մեր բազմաթիվ հայրենակիցներ։

Այսօր «Շիրակ կենտրոնի» աշխատակիցները, բաժանվելով խմբերի, մեկնեցին Շիրակի մարզի տարբեր կողմերի համայնքներ։

Առաջին խումբն Ամասիայի նախկին վարչական շրջանի՝ բառիս բուն իմաստով անանցանելի ճանապարհներով մեկնեց ամենափոքրիկ՝ Եղնաջուր գյուղը, որը նաև Հայաստանի ամենահեռավոր համայնքն է։ Մեր գործընկեր Սամվել Գևորգյանի օժանդակությամբ ձեռք բերված շինանյութը, անասնագոմ կառուցելու նպատակով, ուղարկվեց 6 մանկահասակ երեխաներ ունեցող Խաչատրյանների ընտանիքին: Ի դեպ, անասնագոմը պատրաստ լինելուն պես ընտանիքին կնվիրենք նաև կենդանիներ:

Ավելացնենք նաև, որ այս ընտանիքի մասին «Շիրակ կենտրոնի» պատրաստած «Ծայրահեղ աղքատությունից չեն փրկվել, անգամ, իրենց փոքրիկին հանրապետության նախագահի անունով կոչելով»  տեսանյութի հրապարակումից անմիջապես հետո նրանց հետ կապվել են ՀՀ նախագահի աշխատակազմից և խոստացել են զգալի աջակցություն ցուցաբերել, այդ թվում նաև բնակարանի տեսքով: «Շիրակ կենտրոնի» աշխատակիցների մի խումբ էլ այսօր մեկնեց լեռնային մեկ ուրիշ՝ գեղեցիկ բնության գրկում գտնվող Լեռնուտ գյուղը։ Մեր «Երկկողմանի ծնողազուրկ պատանին երազում է դառնալ հրաձիգ, որ պաշտպանի հայրենիքը»տեսանյութում ներկայացված երկկողմանի ծնողազուրկ 10-ամյա Աբրահամին հագուստներ, խաղալիքներ ու գրենական պիտույքներ էր ուղարկել «Արշակ Դաբաղյանի անվան Մայր Մանե» սոցիալ-հասարակական կազմակերպությունը:

 

shirakcentre.org